朱晨麗出巡被圍 男粉絲幫拖捧篋

朱晨麗拉住個篋四圍行，變身「自由行」，還引來不少途人的注目禮。

「宅男女神」朱晨麗早前為劇集《棟仁的時光》苦練鋼管舞，搞到手腳瘀晒，連大髀內側都磨到起水泡，劇集播出後，除了獲網民大讚外，亦吸納了不少男粉絲，相信她再辛苦也是值得！

日前朱晨麗在鑽石山出席活動，離開時隨即被廿多名粉絲包圍，當中以男粉絲佔大多數，她與粉絲邊行邊傾，有說有笑，親切程度爆燈，難怪一班粉絲對這位女神呵護備至！原本她親自拉篋走，其中一位大隻男粉絲見狀，索性幫她捧住個篋，護送女神上車。

攞贊助扮型

跟一眾粉絲道別後，朱晨麗乘的士前往銅鑼灣行街，沿途見她拉住篋四圍行，十足「自由行」上身。見她先到商場揀選太陽眼鏡，揀了幾款不停埋鏡試戴，不一會已揀到心頭好。甫見記者拍照，她笑笑口打招呼，並說：「因為我新劇嘅角色要扮型，眼鏡係贊助o架！」其後，她去附近做Facial扮靚，逗留約兩個多小時後，戴上黑色口罩拉篋走人，步往附近港鐵站，慳家逼港鐵返將軍澳寓所。

朱晨麗有大批粉絲護駕，仲有男粉絲幫手捧篋，梗係笑得開心啦！	朱晨麗試戴太陽眼鏡，照鏡睇吓靚唔靚先！	朱晨麗搭港鐵返歸，盡顯慳妹本色。

文、攝：追蹤組