心穎性感晒線馬國明：先𥄫為快！

藝人胡定欣、馬浚偉、馬國明、黃心穎、劉心悠及陳煒等昨午出席無綫劇《宮心計2深宮計》宣傳，心穎、陳煒及康華等性感現身，台上蕭正楠抵死地說：「好想睇番我同心悠嘅啜啜戲，我由細睇佢嘅電影大呀！」

定欣向馬浚偉「交人」

之後心穎與馬國明「拍拖」受訪，對於女友性感現身，馬國明說：「事前有睇過套衫，但佢只係傳相畀我睇。（叫佢下次唔好？）咁大個女，有得唔畀咩？不過佢好有品味嘅！」二人戲中奉旨談情，心穎難忘其中一場戲：「嗰場戲拍足成晚，大家喊得好犀利，佢對眼腫晒添！」總監製梅小青在台上表示有感心穎有鍾嘉欣影子，馬國明坦言：「我又唔覺得似，佢哋兩個各有特色。」

剛從內地拍畢劇集返港的胡定欣，隨即要「交人」與馬浚偉綵排舞台劇：「又要練崑曲、又要排戲，驚唔夠時間用，呢段日子要對住馬浚偉。（會日久生情？）咁要睇佢煲啲咖啡靚唔靚！」

心穎劇中與心悠有出浴戲，唔知馬國明有冇先過目呢？	性感打扮的陳煒吐苦水。	胡定欣同馬浚偉摸晒手仔，咁快日久生情？

陳煒唔拆髻照瞓

至於陳煒直言拍此劇辛苦：「臨尾我冇嘢入到腦，好想放棄，最高紀錄幾日冇拆髻，因為想爭取兩粒鐘瞓覺。」而張文慈則表示試過8日冇瞓，感覺如虛脫！

女主角之一的周秀娜缺席宣傳，連海報也「被消失」，而之前其經理人公司與無綫鬧官司，公司旗下藝人都受牽連，對此，總監製梅小青解釋：「冇Cut佢嘅戲份，佢會喺其他平台幫手宣傳。（因兩間公司嘅官司問題？）呢啲留番公司答，應該有啲影響。」

文：影視組