35歲Rosemary佗B5個月倒吊玩瑜伽

Rosemary於2015年底下嫁拍拖5年的印裔富商Jason，每次被問造人大計時，她自言不心急，順其自然。昨日她終於在社交網報喜，宣布懷孕5個多月。從她上載的照片可見，躺在遊艇上的她明顯肚凸凸，手拿一本「孕婦指南」笑得燦爛。她留言稱加入了「媽媽會」：「Joining the club ! Happy Mother's Day!!! #22weeks !（我入會喇！母親節快樂！22周！）」並搞笑留言回覆好友Cara G.，解釋公布喜訊的原因：「依家個肚已經包唔住，唔可以再瞞大家。」

Ana R.分享心得

Rosemary以短訊回覆記者：「多謝大家關心，詳情稍後再覆。」其母親Julie對於就快抱孫，笑不攏嘴說：「唔好叫我湊，畀我玩就開心。（仔定女？）又唔係我生，等佢自己講。（有冇傳授懷孕心得畀阿女？）我好渣，乜都唔識，我係鬼婆。」Cara G.則表示很替Rosemary開心：「希望佢哋可以愉快感受做父母嘅新挑戰。」另一好友Ana R.亦表示興奮：「分享咗佗B心得畀佢，佢預產期遲我10個禮拜，Jessica C.就早我4個星期，今年真係多BB。」

早前Rosemary到峇里島旅行兼玩瑜伽。

兩公婆結婚兩年多，終於成功造人。

做開運動冇影響

心情興奮的Rosemary宣布喜訊前，上載了一段依偎在老公肩膀甜笑的短片，但未有騷肚。早於3月底至4月初期間，當時懷孕約3至4個月的Rosemary遠赴峇里島玩瑜伽，並做出倒吊動作，不少網民得知她懷孕後，都好奇她倒吊會否影響胎兒。婦產科專科醫生余啟文昨日接受電話訪問時表示，若孕婦向來有做運動習慣，做瑜伽很安全：「其實肚入面有胎水同埋子宮夠厚，有做開運動嘅孕婦，倒吊做瑜伽問題不大，但就唔好做一啲衝擊型嘅運動，例如打籃球、滑雪同潛水。」

Rosemary近年熱衷做瑜伽。

Ana（左）與Cara很戥Rosemary開心。

文：專案組