楊張新悅拒做絕育手術避得就避!

名媛楊張新悅結婚十一年,先後誕下三女,去年宣布意外懷孕,第四胎又是女。她笑言就算生仔都無錢分、無丁權、無基金,強調非為追仔佗第四胎。她又稱不接受絕育手術,覺得有違大自然定律,會與丈夫做足安全措施,並自嘲年紀大難再生。

楊張新悅坦言從沒想過自己會如此「多產」,對於絕育問題,她說:「問題咁尷尬嘅!我哋都好努力做防備措施,但有時就係有意外。暫時未商量,絕育手術可免則免,就算微創都係手術,違背大自然定律,始終接受唔到。不過我都40幾歲,應該唔會再有。」腹中BB七月出世,她心情一點也不緊張,一家五口將添新成員,她笑言幻想將來屋企開心指數好高,平日看到女兒們相親相愛好溫馨,從不出現爭寵情況。

唔想變黃面婆

身為獨女的楊張新悅從照顧女兒學到分享和忍耐:「好似一包薯片三姊妹輪流食,佢哋習慣咗等同分享,我覺得人若太自我、太自私將來就會有問題,呢啲係大家庭嘅好處,但唯一係全屋女好多拗撬,不過鬧交係認識自己同對方最有效方法。」她有個良好習慣,就是每晚臨瞓前自我檢討,每日為自己做「人生報告」,將做得好和不好的事記錄下來。

問到婚後一直工作,是否獲老公全力支持?她笑說:「最緊要唔好理佢,如果女人變咗黃面婆,男人都唔鍾意,所以嘥氣!最緊要做你覺得應該做嘅嘢,我係鍾意做嘢,夾硬逼我做全職媽咪,我唔願意又何必呢!老公係支持,支持意思係唔反對。」她坦言與老公曾經歷老夫老妻生活乏味的問題,得出結論是要有健康身體,才可有精神談戀愛及做稱職媽媽。

女人唔補好易老

最近她開始經營網上生意,一來可以在家工作,二來又可分享喜歡的事物:「十年前其實都搞過有機產品實體店,自己好重視健康產品,尤其女人去到四十,唔保養捱唔到幾耐,會喺網店介紹一啲健康保養品,好似『便便』問題亦同時係我嘅問題,會同大家分享。另外又會有朋友將二手物品寄賣,賣出嘅款項會全數捐出去做慈善。」

文:Tracy Leung

髮型:Ling Chow @ QG Private i Salon 四季酒店

服裝:H&M Conscious Exclusive

場地:滝壽司