資深演員米奇離世生前獲曾志偉義助
八、九十年代擅演小人物角色、人稱「米奇」的資深演員吳振東，於5月8日凌晨四時許因病離世。年屆七十多歲的米奇曾演不少電影，包括《A計劃續集》、《紅燈區》等，晚年健康欠佳，經常出入醫院。「香港動作特技演員公會」成員張永漢一直都有探望好友米奇，並指對方經濟有問題，入住老人院要由演藝人協會幫忙交院費。
張永漢說：「佢有心臟病、腦退化、哮喘同中風，今年農曆新年因為病要入住老人院。（佢有冇屋企人？）佢有一位前妻，之前佢話照顧唔到，咁我哋就同米奇籌老人院嘅院費，我哋公會會長錢嘉樂同演藝人協會嘅曾志偉知道呢件事都有幫手，呢三個月院費都係曾志偉嗰邊畀，我就代表特技公會去探佢。」
米奇另一好友鍾發則表示，對方在前妻陪同下走完人生最後一程。至於喪禮安排，他表示：「同佢前妻、佢個仔初步傾過，一切從簡，演藝人協會都會幫手。」
上月曾探望米奇的姜皓文稱讚對方性格樂觀，探望對方時精神尚可：「佢雖然傾談間唔太清晰，不過問佢想食乜嘢都識答，之後我就去開工冇見過。」
