薛家燕珍藏母字金牌暖入心！
藝人薛家燕的三個子女於單親家庭長大，子女疼錫媽咪之餘，亦相當重視母親節。日前，家燕姐以過來人身份，帶同兒子及未來新抱Zoe到單親協會，向單親家庭派發自家出品的朱古力，度過溫馨又有意義的一天！
68歲的薛家燕人生閱歷豐富，婚姻失敗造成不可磨滅的烙印，猶幸三位子女石祐珊、石耀庭（Jackson）及石耀珠陪伴她走過幽暗低谷，成為她的精神支柱！薛家燕對離婚後的首個母親節仍然歷歷在目：「當時真係冇心情，但啲仔女去快餐店買咗漢堡包同我慶祝，我當時攞住個包食唔落，淨係識流眼淚！」
「模範母親」仔女有份
不過，上帝將一扇門關上，自會開出另一條康莊大道！這段經歷令三子女更加團結，成為薛家燕復出的後盾，其事業亦喜迎「第二春」。大女石祐珊見媽媽工作忙，在家擔起管教弟妹的任務，難怪薛家燕笑說：「家姐對細佬妹仲嚴過我，我啲仔女好生性，好似當年我攞模範母親獎，我都話個獎有一半係屬於我啲仔女嘅。」三子女如今各有發展，兒子Jackson更成立製作公司當老闆，為不同企業製作短片及廣告片，令薛家燕十分欣慰。
讚未來新抱夠細心
薛家燕坦言這些年的母親節對她來說苦樂參半，而令她最窩心感動的一次，是三子女夾錢送她「珠寶」：「佢哋攞住800蚊，去金舖買咗個印有『母』字嘅金牌畀我，我珍藏到依家。嗰時Jackson得7歲，有日我發現佢有張欠單寫畀家姐細妹，內容係話欠佢哋200幾蚊，下個月一定還，原來佢將啲零用錢買晒嘢食！」在旁的Jackson聞得「瘀事」即說：「呢件事令我唔敢再問人借錢！」今個母親節對薛家燕來說意義非凡，因她將多一個「女兒」Zoe：「我呢個新抱好細心，知慳識儉，呢排大家咁忙，佢仲煲湯畀大家飲，其實佢工作都好忙。」
文：影視組