6歲夏柏冧碧咸 5.3萬買酒盒

「萬人迷」碧咸（David Beckham）日前43歲生日，除有大仔布魯克林（Brooklyn）由紐約飛返倫敦送驚喜外，更獲6歲孻女夏柏舒芬（Harper Seven）豪送禮。碧咸於社交網上載愛女送上的名牌酒盒，入面有兩隻玻璃杯，並可裝一支紅酒，設計貼心，不過價錢對小朋友來說似乎唔多貼地，被爆價值約5.3萬港元，未知夏柏是靠「父幹」由屋企人資助，還是已經有咁多零用錢豪買禮物冧老竇？不論如何，總之碧咸勁受落，更於Instagram上載刻有夏柏字迹的牌仔，冧爆留言表示錫晒囡囡。