任賢齊日食6餐變大肚婆

藝人任賢齊昨日出席慈善步行籌款活動，他表示要為新片角色增磅，故身形暴脹不少，運動衫下明顯肚凸凸，似足懷胎5月，他笑言影相要縮肚：「依家體重90幾公斤，係有史以嚟最肥，每日食6餐去build up肌肉。」更大呻：「依家搞到啲衫同褲都唔啱着。（太太有冇嫌棄你？）佢最憎嘅嘢都有齊，就係肥、大肚腩、唔梳頭，同埋留尾指指甲！因為角色係一個『行蠱惑嘅麻甩佬』，不過角色去到尾需要減番磅要瘦番，有營養師訓練我，都好辛苦，因本身唔係易肥嘅人。」