藝人戚美珍、蘇姍及李志剛等昨午出席亞視《今晚見》錄影。「三嫂」戚美珍於節目大展歌喉，又自爆老公苗僑偉稱她為「天涯歌女」﹕「我太鍾意唱歌喇，以前做《歡樂今宵》，吳雨成日畀機會我唱。我入行時拜過音樂人鍾定一為師，當時都有諗過做歌手，不過太多唱得之人好似梅艷芳同甄妮咁，所以最終都冇。依家我哋開派對，我就會爭取機會唱歌，有時都唔夠陳百祥（阿叻）同曾志偉搶，好彩譚詠麟有時會拉我合唱。（老公歌喉點？）佢好聰明，唔想畀人灌醉，咪走上台唱歌囉！」
