馮盈盈攬實拍檔讚Strong
馮盈盈昨晚與麥明詩出席活動，對於拍檔捲入「強吻」事件，盈盈說：「啱啱先知，八卦問佢幾句，佢好Strong。（以此為鑑？）好小心嘅，最近拍《白色強人》畀咗螢幕初吻何廣沛，聽講佢咀過唔少女藝人，應該有唔同感受，可能有排名榜，但我唔Care，佢又唔係我男友！」另一曾與魏焌皓合作的無綫女藝人歐陽巧瑩說：「平時同唔太熟嘅異性會保持距離，好彩同我合作過嘅男藝人都好好，拍親熱戲前好照顧我感受，會問吓我接唔接受先。」
舊愛黃榕遇鹹豬手
至於曾與魏焌皓拍拖的黃榕，她表示已沒有聯絡，並說：「我覺得工作係應該專業嘅，要同對方溝通好，戲外就更加唔應該。（試過類似不愉快事件？）試過喺北京同個男演員有床戲，邊個就唔想講，當時試戲佢已經錫到落我胸部，又想伸手入我個Bra（胸圍），好彩我夾實個胸，佢掂唔到，我即刻講我好唔舒服！佢太猖狂喇！正式埋位時佢收斂咗。」另外，有指寇鴻萍女兒唐貝詩曾與魏焌皓拍拖，她說：「冇同佢拍過拖，大家有共同朋友，但冇試過單獨出街。（佢為人點？）佢對我同其他識嘅朋友都好尊重同有禮貌。我唔係事件主角，唔加把口評論喇！」