張敬軒珠片衫閃爆舞台
歌手張敬軒將於6月在紅館舉行的《HINSIDEOUT張敬軒演唱會》一加再加至總數5場，愛靚又愛搞作的軒仔，聽足前輩朱咪咪教路以「珠片衫」吸睛，台上造型閃爆至夠「行頭」！
軒仔今次個唱，首度將他在網絡自創的「降兩度」人物帶上紅館舞台，以降兩度女聲來演唱女歌手的歌曲，故造型令人期待。軒仔說：「我上台有個不成文要求，就係要『閃』，呢個係咪咪姐（朱咪咪）教嘅，以前跟盧海鵬、關菊英同咪咪姐走埠，咪咪姐話上台乜都可以冇，點都要有珠片衫，係『行頭』嚟！所以，即使係『朱義盛』都要閃。」
要識打網絡戰
個唱兩度加場，由6月15至19日共開5場，打破軒仔在紅館的個人紀錄，他坦言沒想過「降兩度」的構思，會為其事業帶來「第二春」的契機，這種玩味手法亦用在拍「燒頭髮」海報上，贏得超高點擊，軒仔坦言：「呢個年代做歌手都要與時並進，要學打網絡戰。（網上畀你無限發揮鬼主意？）係畀咗個平台我去發揮自己好惡頂嘅嘢，但自己係開心咗嘅，快樂係要搵嘅。」其惡搞受網民歡迎，母親可有意料不及？軒仔笑言：「阿媽都有話唔好騎呢喇，但我覺得玩咗先啦！」
晚裝唔夠珠片閃
軒仔一直銘記咪咪姐的「珠片衫」，昨日記者聯絡上她，她說：「唔記得邊度同佢講，但應該有10年前囉！一件十幾廿萬嘅晚裝，都唔及一件舊珠片衫咁閃，只要一出場，紅館大燈射落嚟件珠片衫，會Feel到台下嘅觀眾目光一齊閃，呢個係我嘅經驗所得。（軒仔好記住你呢句話？）咁同我多謝佢，祝佢個唱成功啦！」
文：音樂組
攝：秦健輝
場地：The Emperor Hotel
髮型：TerryYeung@CORNER
形象：ConstanceLee@ConStyle
服裝：LaneCrewford（衫）/HerveyNichols（褲）/JimmyChoo（鞋）