高海寧入廚包餃掂
藝人高海寧入行初期曾參與煮食節目《美女廚房》，事隔多年自誇廚藝再有進步，男友鄧智偉每次都開胃到清碟，她自言一定娶得過！麥明詩則自爆曾靠炒飯成功冧仔。
高海寧（高Ling）、麥明詩、陳凱琳、鄧佩儀、張寶兒（Bowie）與黃美棋等昨日到炮台山為節目《美女廚房》拍攝MV，美女雲集加上甜品美食，場面養眼！
9年前，高Ling曾亮相上一輯《美女廚房》，還得過10分滿分，她笑言事隔多年廚藝再有進步：「其實平時唔多煮！啲主持人話最緊要熟，咁呢樣就冇壓力。（煮過畀男友？）我通常係等食嗰個！」她近年與音樂人鄧智偉感情穩定，問到對方的廚藝如何？高Ling冧笑說：「叻！但我更加叻！我哋中西餐都有煮，佢試過煮豉椒炒蜆、炒蟹畀我食，好好食。我就整過豉油雞、包水餃。（佢有咩評語？）食晒！好食！（你娶得過喎！）我一定係娶得過！」
麥明詩炒飯冧仔
麥明詩則表示想跟好友馮盈盈同一集登場，相信會很有娛樂性：「對比起佢，我應該唔太差！聽佢描述，佢應該唔係好識。（你廚藝點？）喺外國生活過幾年，食唔死人，中西餐我都識，識整四川孜然牛肉、口水雞、蒸魚、烤雞，仲識開蠔！（驚要劏生嘢？）都係動物啫！」笑言中學時劏過牛眼，又可以請教做醫生的哥哥。講到過往有否獲男友讚賞廚藝？她表示讀大學時炮製過瑤柱蛋白炒飯給男仔，兩星期後便開始拍拖，直言女生懂得下廚會得到男生欣賞。
張寶兒反對閃婚
至於Bowie表示前晚為男友袁偉豪（Ben）炮製餃子，提到對方日前睇戲與人發生爭執，Bowie認為只是誤會，當作是「不打不相識」。提到Ben早前透露爸爸時日無多，她表示男友一有時間便會陪父親，自己也會相陪，問到會否考慮閃婚沖喜？她直言不會，不想因時間逼大家做出任何衝動決定。
文：影視組