趙學而持續好平 爭氣開騷

46歲歌手趙學而前晚在紅館舉行個人演唱會，除了建築師老公撐場外，好友陳奕迅、袁詠儀、蔡一傑及廖碧兒等亦有捧場。嘉賓張智霖甫出場與學而拖手又攬又抱，深情合唱，他除了取笑學而是「樂壇人乾」，又開玩笑指答應做嘉賓是因為大家一樣老皮老肉：「就係因為你唔會講自細就聽我嘅歌大，唔似啲冇教養嘅後輩，我以後都唔會做佢哋嘅嘉賓！」而學而今次似乎盡地一煲，全晚不乏性感歌衫大騷骨感身材，壓軸一套閃閃Bra Top配以低腰長褲，明顯見到心口平到離晒罩，連她都開自己身材玩笑：「有啲女仔唔夠信心會加啲減啲，冇乜幾個好似我咁死都唔加，Keep住『好平如潮』，老咗都唔會墮！」

為自己揀嘅路堅持

到Encore部分，學而突然自爆往事：「當年有段時間事業發展遇阻滯，一名位高權重嘅人同我講：『你冇價值(口架)喇！』又有另一名位高權重嘅人同我講：『你唔唱歌唔會死啫！』我講過，爭氣呢兩個字係好難，不過廿幾年我都等到，往後嘅日子係點冇人知，每個人都應該為自己選擇嘅路堅持落去。」獲全場觀眾歡呼拍手。

趙學而	張智霖與趙學而曾是登台拍檔，合唱自然有默契。	趙學而大露背Deep到貼近股邊。

涉「位高權重」的人

學而騷後受訪，封口不談哪位「位高權重」的人指她冇價值，至於誰跟她說「唔唱歌唔會死」，她就叫大家去猜，又表示要多謝對方：「如果唔係嗰番說話，我唔會有咁大決心繼續行落去，人哋嘅一句說話唔等於可以抹殺你過往所有成績，多謝佢令我可以喺唔同範疇再得到好多成績，到今日可以返嚟舞台唱歌。（覺得自己爭氣？）我為自己爭氣，唔覺得要做畀任何人睇，係做畀自己睇。」

陳奕迅與蔡一傑、蔡一智夫婦與袁詠儀齊齊捧場。

放大圖片

文：音樂組 　

攝：司徒國榮