曾於劇集《親親我好媽》被郭子豪暗戀的陳敏之，讚他為人乖巧兼有潛質：「依家公司畀機會更加要珍惜，近排睇佢網上啲相大隻咗咁多，爆晒肌咁，手臂同以前兩個Size，原來係為咗節目，所以覺得佢應該要更加努力同珍惜。」
至於與子豪合作劇集《三個女人一個「因」》的黃智雯，早前出席宣傳時忍不住「非禮」男方的麒麟臂。對於拍檔為比賽喪操身形，智雯接受訪問時鼓勵對方：「知佢拍《三》劇嗰陣都有健身，近排有留意佢嘅社交網，見佢特登花好多時間喺健身度，就知佢好努力、好正面，係好事嚟嘅，支持佢。」