傳為江嘉敏頻失場 港版阿諾郭子豪激嬲無綫 操肌比賽博翻身

現年26歲、有「港版阿諾」之稱的郭子豪（Arnold）擁48吋巨胸，2014年加入無綫拍劇，即深得不少「姐姐級」藝人歡心，跟他合作過的黃智雯、呂慧儀等都對他有讚無彈，其戇男形象，更令他成功吸納不少粉絲！近期他憑無綫劇《親親我好媽》及《三個女人一個「因」》火速上位，早前更被安排擔任劇集《好日子》第三男主角。

前途原本一片光明的Arnold，去年底竟無故甩底倒數騷！據知，他因為感情問題多次缺席活動，惹得高層震怒，最後被飛出《好》劇！更有指他拍《親》劇時與江嘉敏分外投契，令人覺得其感情問題「緣」於這位宅男女神！為挽回事業，Arnold決定參加八月底舉行的健美比賽，希望建立肌男形象。最近他狂食及做Gym，每日要吸收相等於25碗飯的5,200卡路里，已於4個月內增40多磅，胸肌由原本的40吋暴脹至48吋，臂圍更達18吋，超級誇張！

有指郭子豪與江嘉敏拍劇時非常投契。	郭子豪在健身教練指導下舉鐵，谷行麒麟臂的他面容扭曲。	郭子豪與袁偉豪於《三》劇內大晒結實肌肉。

面容扭曲操到嘔

日前下午兩時許，Arnold被發現於尖沙咀狂掃小食，為了增肌的他化身食物焚化爐，買了兩串魚蛋及雞蛋仔，兩啖極速「KO」！之後又到健身用品專門店，買下四罐增磅奶粉，離開時他打算截的士，但被粉絲認出及要求合照，他即顯「力王」本色，單手拎住四罐奶粉與粉絲自拍。

其後Arnold如常到健身中心操肌，見他主要操練下盤肌肉包括大腿肌及股肌，在教練指導下，兩小時內做了六Set動作，每Set做五至六次，見他負重的鐵餅重量超驚人，深蹲孭起約400磅重量；撐腳一Part更達500磅，難怪做到面容扭曲！

全「力」以赴的Arnold做到第三Set時，不時合埋雙眼抖大氣兼標冷汗，眼神迷糊的他突然走到垃圾桶狂嘔，周遭的健身人士見狀大為吃驚！但他抖一陣又去操肌，之後頂唔順又嘔，結果嘔足三次，認真慘情！他做完Gym後渾身乏力，離開時行路猶如慢動作！

黃智雯欣賞拍檔郭子豪努力操肌，值得鼓勵。	郭子豪用腳撐的鐵餅重達五百磅。	做到頂唔順，郭子豪索晒氣。

唔敢高攀女神

Arnold事後接受訪問，提到江嘉敏時非常避忌：「真係識得太耐喇！已經變咗姊妹，佢女神級嘅級數完全高攀唔起。（你感情狀況點？）穩定啦，多謝大家關心。（女朋友係邊個？）圈外嘅，從事教育工作。」對於之前劇集換角及無故甩底，他解釋：「因為嗰排屋企有啲私人事，所以唔可以工作。其實都有同無綫解釋，佢哋都明白同包容，喺拍《好》劇嗰陣，監製知我有事唔能夠演出，都搵咗另一個同事頂上。」至於江嘉敏亦否認戀情：「我哋冇拍過拖，都唔覺佢有追求我嘅意思。未入無綫之前都一齊喺工作上合作過，拍《親》劇對手戲都唔多，但之前拍宣傳片對手戲會多啲，因為故事係講我暗戀佢。」她大讚郭子豪幽默，問到是否喜歡這類男生？她說：「唔會因為佢幽默而鍾意佢，最緊要睇吓大家夾唔夾。」

文：影視組