Lexi Wood鍊贏嘉兒激咀布魯克林上位

布魯克林（Brooklyn）作為碧咸（David Beckham）與辣妹Victoria的大仔，一舉一動當然備受關注，他與新歡於荷里活紋身店激咀，網友自然極速對這位揮低其舊愛嘉兒莫蕊茲（Chloe Moretz）的靚女起底！原來她是20歲加拿大女模Lexi Wood，曾先後為《Vogue》、《Galore》與《花花公子》（Playboy）等雜誌拍照。

「坐正」公然調情

10歲便已出道擔任模特兒的Lexi，在社交網Instagram人氣甚高，經常在社交網甫性感相大派軍糧，深受麻甩仔歡迎，有逾8萬7千名追隨者！相信她與「碧咸之子」的戀情曝光後，會令其人氣再急升！以「小三」姿態鍊贏嘉兒的Lexi，最近就「坐正」，於男友在Instagram貼出的半裸晒新紋身照片留言畀like，更留下一個舔脷的表情符號，示意男友半裸好吸引，公然調情！

因受欺凌發憤

Lexi借戀情上位，即吸引各大傳媒搜刮其資料，更被翻出她3年前接受《Galore》雜誌訪問時，自爆求學時期曾受欺凌：「我喺高中時期曾被一大班女仔欺凌，我不但冇為自己出頭，更冇嘗試阻止。我最終離開咗間學校，改喺屋企上堂，但願我能夠反抗。謝天謝地嘅就係喺屋企上堂，令我更認真地追求做模特兒。我認為一切都係有原因嘅，所以雖然我好後悔冇為自己出頭，但如果唔係嗰啲卑鄙嘅女仔，絕對唔會成就今日嘅我。」此外，她指若有日變成動物的話，最想做天后Taylor Swift隻貓，因為獲Taylor照顧就會是世界上最幸福的動物。Lexi在訪問中亦坦承自己是很浪漫的人，相信一見鍾情，更表明好恨為Victoria's Secret行內衣騷。文：外娛組

唔夠碧咸專一

累女友收死亡恐嚇

布魯克林沒遺傳到老竇碧咸的用情專一，除了時常換畫之外，更個個都是「揀手貨」！在Lexi之前，他就先後與多位「圈中索女」拍拖。除了與「紫天椒」嘉兒莫蕊茲拍拖4年外，他亦先後與加拿大樂壇小天王Justin Bieber的「前度」Sofia Richie及Madison Beer拍過拖。

其中巨胸模特兒Madison更因與布魯克林拍拖而收到死亡恐嚇！她曾於訪問中說：「我日日都見到（死亡恐嚇），一瞓醒就已經（被人）叫我自殺30次，好瘋狂！我認為咁樣好羞恥，（死亡恐嚇）唔應該因為我追夢同做音樂而嚟。」但她明言不會因負評與恐嚇而屈服，堅持勇往直前！