視帝「臭寸」扮大哥借醉開拖

做藝人形象好重要,最緊要EQ夠高,不過好似現時主攻內地市場嘅視帝「臭寸」咁,多年來自我又高傲嘅性格,真係要收一收,成日炮仗頸得罪人多。以前喺大台做一線小生,當然扮大哥,對住工作人員態度一般,好多幕後都背住佢嘴藐藐。點知返到內地拍劇,真係畀佢發圍紅咗,仲唔一身霸氣咩!不過惡人終害己,有次「臭寸」要拍一個跌落坑嘅場口,點知畀人掟石仔落去,當然有啲係乘機加害啦!人緣可見一斑。

最近佢個朋友結婚,點知佢又唔熟性,臨到散席,可能飲大咗兩杯,又走去同人嘈。據現場人士講,原來佢兩個之前已經有牙齒印,當時對方仲除晒外套諗住「開拖隻揪」,好在現場兄弟多,即刻將佢兩個隔開先冇事咋!唉!如果真係打起上嚟,都咪話唔失禮,瓷器撼缸瓦,到時邊個輸蝕先?