馮盈盈大情大性64巴港女上身

入行三年多方發展

早前馮盈盈於劇集《果欄中的江湖大嫂》中，飾演人稱「小狼女」的酒吧老闆娘，角色性格豪爽兼粗魯。首次正式拍劇的她坦言作為新演員，能在角色上予人鮮明印象已經好好：「起碼有嘢畀人記住，好過好模糊，唔知你特色喺邊。如果大家覺得呢個特色適合我，其實都係一件好事嚟。」作為拍劇新手的她，未來想有更多新嘗試。

參選港姐奪冠入行近三年，盈盈指事業發展比她想像中開心：「首次主持係《千奇百趣》，之後加入《學是學非》，再開始《#後生仔傾吓偈》，依家又可以參與拍劇，多謝公司畀機會我呢啲新人，但都係起步，知道自己好多位都未夠完美，希望喺各方面繼續磨練。」問到可想於主持或戲劇方面發展，她直言不會框着自己，會同時於多方面發展。

拍劇初哥馮盈盈連累拍檔衛志豪捱打64巴，導演才收貨。	盈盈在《果欄中的江湖大嫂》中，演活粗魯角色更有爆樽場面。	盈盈感激男友在她情緒失控時，出盡力包容和諒解。

貼地親民講真話

言論一向破格的盈盈，於《#後生仔傾吓偈》探討的話題較為大膽，問到可會擔心影響港姐形象？她說：「我覺得港姐可以好多樣性，唔使出嚟一定要斯文高貴，我呢啲大情大性，貼地同親民啲，都係豐富番港姐個光譜，港姐都可以有唔同風格同路線。」已卸任的她，直言不會有港姐包袱，反而希望帶多些新鮮感給觀眾。對於被封為「MK港姐」，她不覺得標籤帶有貶義：「MK文化都係香港獨特嘅本土特色嚟，冇需要覺得係貶義，其實MK仔女都係義氣仔女。」

盈盈（左）在《學是學非》中，盡顯活潑生鬼的真本性。	盈盈顛覆高貴斯文的港姐形象，認為真性情才夠貼地。	盈盈自爆與男友夾過時辰八字，打風都打唔甩。

連拍八Take累拍檔

對於劇中的角色，她坦言與自己的真性情相似，對白都是大家平時說開的用語，同樣夠晒貼地，相對較容易投入角色。問到其真性情可有嚇怕對手，盈盈指初次正式拍劇未能掌握力度，搞到於《果》劇演「古惑仔」的衛志豪都嗌怕怕：「有場戲我綁佢喺張櫈度大大力摑佢，我第一次拍劇冇乜經驗，點樣借位留手完全唔識，大巴大巴咁摑咗落去，好彩佢體諒又包容，被我連摑咗64巴，因為一個Shot要摑八巴，然後拍咗八個take，啪啪聲被我打到面都腫，打到我手都痛。」這種情況要像她沒有經驗先做得出，經過今次會學習如何借位拍攝。

男友發力包容體諒

盈盈又指男友非常支持其演藝事業：「佢見到工作上畀到滿足感我，我又好有熱誠、好專注咁做，但坦白講有時都辛苦，有啲情緒控制唔到。第一次拍劇冇經驗，有時未抽離到，會發洩喺身邊人身上。（因為工作而有摩擦？）佢見我辛苦，用多啲力去諒解同包容我，辛苦咗佢，所以我拍完劇都會對番佢好啲嚟補償。」

麥玲玲為戀情加持

她更坦言入行後因工作時間令二人的生活節奏有所改變，問到可有擔心出現感情危機？盈盈對戀情充滿信心，還透露曾將二人的時辰八字給麥玲玲批命：「佢話有信心會有好結果！我有玲玲師傅嘅加持就唔驚啦！」現年23歲的她謂暫時短期內都未有結婚打算：「玲玲批我條命過多好幾年先有機會結婚，呢段時間梗係留嚟事業搏殺，趁年輕梗係專注工作先啦！

文：影視組　

攝：吳文聰

服裝：mi-tu，MAGinSHOP

髮型：Tonnis Lee@Hair Salon

化妝：Moe Lo@Moe's Makeup