馬浚偉半夜氹定欣落疊
藝人馬浚偉6月將重演其舞台劇代表作《偶然‧徐志摩》，請來「舞台女新人」胡定欣演出女主角陸小曼。馬浚偉指定欣能歌善舞身段好，劇本上的修改主要讓她發揮：「今次會加一段由定欣Solo兩分鐘嘅水袖舞，佢一聽到呢個提議就話好，今次同佢合作，最開心係大家都鍾意接受挑戰。」
馬浚偉指拍無綫劇集《宮心計2深宮計》時反過來被定欣感動，特意邀請她演出：「身為兩屆視后，佢依然係凌晨5點收工、8點起身化妝開工，我問佢點解要捱？佢話覺得自己係幸運，但唔代表有特權，聽完我對佢印象加分，有一晚凌晨我問佢有冇興趣演舞台劇，佢本嚟一個攰樣，聽到就兩眼發光話好，連咩條件都冇問。」
講明錢銀有限
請得無綫當家花旦胡定欣演出，是否開出好價錢？馬浚偉即說：「今次要多謝TVB，我同樂小姐（樂易玲）講，呢個係舞台劇，錢真係有限，我盡力畀到最好嘅價錢畀一班演員。（叫你接劇交換條件？）冇，但拍劇我一直都好樂意，不過唔會係今年嘅事，我手上仲有兩部舞台劇劇本，計劃緊明年一月演另一部。」
文：影視組