薛凱琪守住Dry缽 謝絕爛燈盞

歌手薛凱琪（Fiona）及江希文前晚錄影無綫節目《流行經典50年》，Fiona獻唱初出道作品《奇洛李維斯回信》，直言不知不覺已成為很多人的回憶。

得3分鐘都要食麵拍拖

工作狂Fiona透露剛完成網劇拍攝，又忙於籌備國語唱片，還要為自己的服裝生意開會，問到豈不是沒有時間拍拖？她笑說：「任何人甚至係天王巨星話冇時間拍拖都係呃你嘅，尤其我呢啲注重戀愛嘅人，如果有伴侶，一定搵到時間拍拖，抽三分鐘時間去食碗車仔麵都係拍拖。」不過，單身的她表示沒有追求者，認為要看緣分：「如果因為適婚年齡而影響到對男人嘅選擇，真係會揀錯o架！」她又指父母亦不心急，並笑說：「父母根本唔鍾意我拍拖，因為驚我搵錯對象。」

江希文練歌囡囡嫌嘈

而有十年沒有上台唱歌的江希文自爆事前獨自唱K練歌：「依家有個女都好少去夜街，冇乜機會唱歌，會喺屋企練，但係個女就覺得我好嘈，佢唔知我以前係歌手。（有冇興趣再出碟、拍戲？）有人搵我梗係有興趣，唱歌自由度大啲，拍戲就難啲，個女依家5歲好黐我，個女放第一位。」

文：影視組