56歲吳鎮宇6舊腹肌收貨
近年男星之間掀起一片操肌潮，表表者當然是張家輝、張繼聰等，想不到連56歲的吳鎮宇都加入戰團！早前他為新片刻苦健身，雖然不算爆肌，但以書生型的鎮宇來說，能夠操到有胸肌及六舊腹肌，效果都相當不錯，不少工作人員見到他脫衣晒「新Body」都嘩聲四起！鎮宇受訪時牙擦擦笑言天生大隻：「其實我一出世，就已經有胸肌、腹肌、三頭肌0架啦，總之乜都有啦！」但自己講完都忍唔住笑。
攰到爆都繼續操
鎮宇為操肌付出不少，做器械運動經常操到筋疲力竭，做Sit-up時更汗滴地板，有苦自己知！他直言：「好多時練到好攰嘅時候，就會打籃球、打拳，總之要Keep住練。」不過鎮宇沒有特別節食，坦言不想操到太大隻：「我依家可以轉手（抓）到背脊，如果太大隻（抓）唔到0架！」雖然電影經已完成，但鎮宇揚言會Keep住操肌，全因想保護家人：「依家世界太多負能量，搭車、搭船、搭飛機都會見到，我哋又喜歡一家大細出埠，男人真係要練多啲保護屋企人！」
文：影視組
