郭秀雲斥Andi媽離譜 索數萬「湊女費」
藝人吳綺莉的圈中好友郭秀雲，昨日代友出頭，質疑卓林的外籍女友Andi居心叵測，更揭露其母曾向吳綺莉索取數萬元當作「湊女費」，又暗寸Andi有不良嗜好，呼籲大家千萬不要接濟卓林與Andi！
吳綺莉（Elaine）女兒卓林，與補習老師女友Andi拍片放上網，聲稱在加拿大走投無路要求助，兩人不單捱餓瞓街邊，卓林更自爆有創傷後壓力症（PTSD）。吳綺莉好友郭秀雲昨日大爆Andi母親曾向Elaine攞錢，直斥離譜：「太約喺半年前，個補習老師阿媽打電話鬧Elaine，話佢做乜阻住卓林同佢個女一齊，話『咁你畀個女我喇！畀幾萬蚊生活費我，我幫你湊女！』我聽到之後真係好嬲，諗過打電話鬧番佢，但諗諗吓又點解要同佢一個Level啫！」
暗示有不良嗜好
問到Andi母親的目的是否為錢？郭秀雲說：「唔難明呢樣嘢囉！個補習老師之前都有男朋友，一齊生活咗10年，佢不嬲都冇乜點做嘢，間唔中有少少補習，不過我睇佢畀我嘅訊息，我唔覺得佢啲英文叻得去邊，唔知佢憑乜嘢幫人哋補習。我大膽講句，我都係半個鬼婆囉！」郭秀雲繼續爆料：「個補習老師生活好唔檢點。（覺得佢有不良嗜好？）唔係覺得囉！之前都驚動過警方去Elaine屋企搜，Elaine係有飲酒同食好多煙，但佢冇任何不良嗜好。」
被鬧「唔尊重愛情」
半年前的卓林還未成年，郭秀雲說：「佢（補習老師）同一個未成年少女一齊係唔合法(口架)嘛！呢件事本身就唔啱，個補習老師仲傳短訊鬧我唔尊重愛情，唔尊重佢哋兩個，佢講嗰啲全部都係廢話！」她呼籲大家不要畀錢卓林與Andi，不要接濟她們：「以前卓林喺香港仲有做嘢時，佢返工都拖住條女一齊，又唔定時，身為一個老闆，點可以接受一個員工帶住女朋友一齊返工呢？香港地生活，兩公婆都要一齊去搵食，唔係淨係恩愛，但佢哋就覺得全世界都唔畀佢哋恩愛囉！」
文：音樂組