鄭俊弘否認玩失蹤飛出新劇
歌手鄭俊弘（Fred）、泳兒、陳敏之及薛家燕等前晚錄影無綫節目《流行經典50年》。有指Fred原本在劇集《逆緣》飾演陳家樂的角色，但劇組多次致電都找不到他，加上被爆與何雁詩的戀情令形象插水，他因而被飛出劇集，Fred否認傳聞：「梗係唔會！你覺得我會唔會唔聽公司電話？當時我都有同監製王心慰溝通過，嗰時選緊角色又未落實，我又報咗名去美國讀音樂，可能時間配合唔到。（因負面新聞而失去機會？）一定有o架啦，所以要啲時間沉澱吓！」
至於泳兒（Vincy）透露節目中會獻唱她的第一首派台歌《感應》：「呢排少咗喺香港唱，因為上年年中失聲，依家身體康復慢慢唱番，呢隻歌對我嚟講意義好大。」提到前日遇上火警演習，佢笑言：「同事聞到燶味，我行咗27層樓梯，落到樓下保安員話係演習，我O晒嘴！原來全公司都知，係得我一個唔知！」另外，將於6月娶新抱的薛家燕透露忙於減磅，並預告屆時的造型似足登基般華麗，問到會否盡騷事業線？她笑說：「又唔使，個仔叫我保持低調。」
