高海寧鄧佩儀沖地獄特飲預咗墊底

高海寧（高Ling）、鄧佩儀、蕭正楠與林盛斌（Bob）等，昨日到馬鞍山出席節目《美女廚房》美女學徒招募活動。兩位靚女打頭陣為主持阿蕭及Bob炮製「彩虹特飲」，阿蕭飲過佩儀的飲品後即面有難色，相當搞笑！

最怕劏鱔「死唔斷氣」

佩儀自爆有「地獄女廚神」外號，最擅長用壓力煲煲湯：「我有睇晒上一輯節目，知道有個美女廚神榜，我有信心會喺榜嘅底層！」而在上一輯節目封「地獄廚神」的高Ling，笑言最難忘煮鯊魚：「成條鯊魚咁上，當時真係呆咗，最後用咗魚頭煲湯，再整咗紅燒鯊魚！之前有參加big big channel直播節目煮鱔，真係好殘忍呀，佢哋唔易死，切到一截截都仲識郁！（煮田雞呢？）要劏嘅都驚(口架)！不如今次整簡單菜式，好似蝦仁炒蛋、叉燒飯咁！」在旁的佩儀笑言最怕龍蝦：「有鉗嗰啲都好驚！」

鄧佩儀同高Ling夾手夾腳沖飲品，好似有啲料到。	蕭正楠個樣咁淒涼，唔講仲以為佢被賜毒酒！	蕭正楠擘大口等靚女餵，唔怕翠如扭耳仔？

阿蕭及Bob透露將為節目招募女廚神與女助手，問到有何條件？阿蕭笑言是「眼耳口鼻齊」，Bob則說：「我就睇埋個身，即係手手腳腳都齊！陳瀅都有自薦，希望今集請晒啲新嘅女藝人同女神上嚟！（地獄廚神可以令節目效果好啲？）相信都會有嘅！」

Bob「自備」美女助手

提到現場有20位素人及Model上陣，阿蕭笑說：「好似都係阿Bob Call嚟！（叫女友黃翠如上節目平反？）有機會畀佢顯露吓身手，佢依家好好多喇，希望上到嚟阿Bob好關照呀！」

另外，Bob透露細仔再因高燒40度入院，相信是喉嚨發炎，但因太太不在家，所以要父兼母職，負責照顧家中四個寶貝仔女。

文：影視組