劉倩婷教女識放手畀自由

港姐冠軍兼慧妍雅集會長劉倩婷(Sandy),婚後仍然為慈善不遺餘力,近日致力推廣培養兒童閱讀習慣。對於囡囡從小愛閱讀,Sandy認為除了身教外,還要畀足自由空間:「作為家長唔希望有框框規限佢點樣做,畀佢自由發展會更好!」

劉倩婷與堪輿學家李丞責2013年結婚,3年後誕下女兒李阡辰,幸福美滿。雖然Sandy作為慧妍雅集會長,忙於不同的慈善工作,但她將工作和家庭分配得宜,近日慧妍雅集與慈善機構「香港小母牛」合作,推廣閱讀計劃,本月將舉行一個大型工作坊,讓兒童明白閱讀的樂趣。如今不少小孩都愛用電子產品,Sandy指兩歲的囡囡偏偏最愛看圖書:「佗佢時已胎教講故事佢聽,Daddy仲會同佢講啲中國歷史,BB每次聽完都會有反應。唔知係咪因為咁,依家佢會自己拎書睇,仲鍾意睇啲靚嘅、公主類嘅書,一日亦會睇書3至4次。」

做個好榜樣

囡囡阡辰如此乖巧,Sandy自有一套教育方法,她認為應給予小孩適當空間,作為家長要做好榜樣:「我畀小朋友嘅空間幾大,盡量唔會畀框框規限佢點做,咁佢個發展會較好,因為每個小朋友能力同潛質都唔同, 如果規限太多反而會阻礙佢發展。但我認為好似禮貌、尊重、唔可以亂發脾氣同扭計都好重要,咁做家長就要做Role Model(好榜樣),要做得好、有耐性解釋畀佢聽點解要咁做,令佢明白。」

嚴母慈父有商有量

Sandy與老公李丞責在家中有分配教女的角色,Sandy自言是嚴母,因老公非常疼錫囡囡:「我哋都唔主張鬧,Daddy會講好多人生道理畀佢聽,又呵護備至,所以囡囡好嗲佢。我就會嚴厲啲,我哋會互相提點,我覺得有時候要識得放手,畀佢試吓,唔好令佢養成依賴態度,將來有咩困難都可以自己照顧自己!」Sandy希望待女兒長大到有自理能力,就帶她一同參與探訪活動,令囡囡明白幫人是開心的事,足見為人父母的苦心。

文:陳曉柔

攝:張福宏

髮型 : Calvin Tsoi @ Hair

化妝: Frances Ho

場地:PENTHOUSE