荷里活型佬畢彼特（Brad Pitt）前年與安祖蓮娜祖莉（Angelina Jolie）婚變，繼安祖蓮娜多次傳出新緋聞甚至準備秘婚的消息，畢佬近日都唔輸蝕，被爆已有新目標，與擁有以色列血統的42歲著名建築師兼麻省理工學院教授Neri Oxman擦出「火花」！
54歲的畢佬爆出離婚後一直相當低調，曾被指專注搞藝術，原來他搞藝術都有艷遇！出名是建築與設計愛好者的畢佬被爆出在一個新建築計劃中，被介紹與Neri合作，有不少共同興趣的二人勁投緣，據知情者指：「Brad與Neri一見如故，因為佢哋都熱愛建築、設計同藝術。佢哋關係最好嘅形容係工作友誼。」
但有指兩人關係還未更進一步，知情者續說：「佢哋嘅友情未變成愛情，因為兩個都好小心，而呢段關係，再講一次，係工作友誼，但畢佬好有興趣同Neri相處更多時間，佢真係令人着迷。」
Neri與畢佬同樣曾經失婚，其前夫為阿根廷作曲家Osvaldo Golijov，至於她本人擔任麻省理工媒體實驗室教授，亦是藝術家，作品見於紐約現代藝術博物館、巴黎龐比度中心、維也納應用藝術博物館、波士頓美術館與科學博物館。至於畢佬近年醉心建築工作，曾自言：「演戲係事業，我嘅熱情係建築工作。」他創辦的Make It Right建築基金，致力為有需要人士興建價錢相宜的太陽能寓所，並曾與不少建築師合作，為新奧爾良受風災影響的居民重建家園。
文：外娛組