黃智雯攝時間補眠 秒速回魂！
藝人黃智雯在無綫劇集《三個女人一個「因」》中擔正「女一」，更分飾三個不同性格，口碑不俗。風光背後，她透露拍攝期間嚴重睡眠不足，每日僅得一、兩小時休息，故會趁埋位前爭取時間閉目養神，她說：「我會坐喺張外景櫈度小休，坐坐吓就會瞓着，瞓到昏迷咁，不過已經訓練到起身埋位就立即回魂，仲要入到戲添！」
隨處拉筋
而有舞蹈底子的她，拉筋已成為每日的習慣，更會拍到邊拉到邊：「平日開開吓工，都會放隻腳上去欄杆度拉筋，拉完之後就會成個醒晒，啲筋鬆咗，個人都舒服啲！有人經過都會有少少奇怪眼光，但我冇理咁多，如果仲未埋得位，就會做啲簡單嘅Gym動作，好似腹部運動咁，爭取時間Keep Fit吖嘛！」
