衛蘭放假豪食
歌手衛蘭（Janice）昨日同音樂人舒文到電台宣傳新歌《生涯規劃》，問到Janice自己的生涯規劃？她笑言：「放假嘅時候可以盡情食嘢，工作就努力做好，依家個人係好感恩，自己條路都唔易行，但係就得到好多嘅機會。」
Janice又自認得到身邊人的鼓勵，變得更加開朗正面：「人哋話我多嘢講咗，學識唔好太計較人哋點諗，想表達嘅嘢要用更平和嘅方式去講，唔好咁寸。好似我舊年開始學國語，就算講錯都好，都要大膽啲，咁先學到嘢。」對於工作安排，Janice透露今年會推出福音碟：「好興奮有呢個決定，呢個係我一路以嚟都想做嘅嘢，會有我自己嘅風格。（會同妹妹一齊唱？）有一首係同佢合唱，因為呢個信仰對我哋兩個嚟講都同樣重要。」