逆戰人生成就宗師 黃秋生完全變態智抓龍根
香港貴為「動」感之都，乜都可能發生，唔激「動」就假啦！出街幾乎要笠頭盔，驚畀假難民打劫，莫講話焗住租劏房上車難，死咗上龕位延續「上車夢」都咪使旨意，就連想買飛睇騷Relax吓，都要同黃牛黨鬥智鬥力，瞓街都未必買到！唔怪得香港打入全球不快樂地區第七位，同戰火連年、細路食飯都幾乎要拎住機關槍嘅戰亂國家一齊入榜！真係咁灰？奇迹就喺眼前！最近激動人心、帶畀港人一股暖流嘅，當然係影帝黃秋生醉酒網上留言尋父，成功尋得龍根，仲要發夢都冇諗過，多咗三個阿哥家姐，遲啲約埋BBQ敍天倫，齋諗個畫面都夠晒「真情」，真係笑聲笑聲滿載溫馨，秋生變咗叉燒炳，唔係人肉叉燒包，燒雞翼我鍾意食呀！
電話費手術費一仙都冇
56歲嘅秋生名利雙收，上有高堂，有妻有兒，喺華人影壇佔重要席位，好多人同我Nuts哥講，話秋生乜都有，做乜要認番呢個狠心拋妻棄子嘅衰老竇？4歲畀老竇拋棄，阿媽打住家工，真係命運是對手，邊敢低頭？秋生12歲要做手術，阿媽越洋急Call老竇，點知對方要求Collect call，即係要佢阿媽負責畀電話費先肯接聽電話，聽完電話就話一毫子手術費都唔畀！一夜夫妻都百日恩吖，衰到百二蚊都唔肯畀，生埋仔住埋過四年，生死關頭，驚死人哋攞債攞着數，Collect call變為Final call，冇再聯絡！秋生話阿媽以前係「自殺專家」，仲爭啲畀佢隊冧埋！佢話阿媽試過大住肚跳樓，又曾經餵佢飲洗衣粉，搞到送院洗胃，醫生問食錯乜，阿媽話舀錯咗洗衣粉！冇睇錯，唔係奶粉，係洗衣粉！
就好似當年田蕊妮笑洋名為Anthony Wong嘅秋生，係「Anything Wrong」一樣，佢嘅人生乜都係錯咁！見人哋父慈子孝，自己阿媽就捱到十隻手指頭都腫晒，窮到買米都冇錢要問人借，看盡人情冷暖，但反而練就佢逆境自強，識搵方法生存！十幾歲拜大聖劈掛門下，緣於自保，因讀寄宿學校猶如入集中營，成班𡃁仔除咗打交都係打交，尤其佢「半唐番」奀挑鬼命，啲𡃁仔當玩「Mon hunt」猛咁圍攻佢！拳頭硬，都未得民心，有次老師發現道門爛咗，問極都冇人認頭，罰晒全校二百幾個𡃁仔冇電視睇。秋生就型嘞，玩頂包，走出嚟話係佢做，咪以為佢戇居，佢話頂包都係畀人打十下手板，但換嚟係二百幾個𡃁仔有電視睇喎，仲唔當佢神咁拜？條數識計，唔使用拳頭對付班豬頭！
衷心講句Fxxk and thank you
睇到呢度，點解秋生想搵番個老竇？答案係放過自己！毛蟲變蝴蝶，生物學以「完全變態」（metamorphosis）形容進化過程，秋生無論事業同人生，一樣都係「變態」！將悲喜交集、不平凡嘅歷練放諸演技，拍《人肉叉燒包》做變態殺手成名，到今日戲路闊過維港，成為戲劇大師；半百知天命，心態改變，開悟放下，情與義值千金，仇恨已成往事。萬里尋親，唔只認祖歸宗，佢選擇咗原諒老竇，放過自己。人生匆匆，好多嘢可以將錯就錯，有數之不盡嘅遺憾，秋生大可以同老竇一樣，將呢份遺憾同私生子嘅秘密，百年歸老時，塵歸塵土歸土，一切歸無，但佢選擇認清面對，恨人亦要花氣力，仲要同自己過唔去？秋生話如果真係見番老竇，第一句會講：「Fxxk！」但我相信，佢下一句會話：「Thank you！」因為要感激老竇嘅離棄，教懂佢逆境自強，靠自己打拚出豐盛人生。
Nuts哥