陳美齡恨抱孫愈多愈好
資深藝人陳美齡昨日娶新抱，擅長花藝的她親自插花布置：「啲仔有幫手，插出嚟怪怪哋！」她大讚新抱又靚又純，又送上家傳之寶的寶石頸鏈給新抱，更開到口恨抱孫：「愈多愈好！」
昨日娛圈喜事重重，除了歌手羅力威與雨僑結婚，62歲歌手陳美齡（Agnes）亦娶新抱，婚宴於中環私人會所舉行，筵開16圍，陳志雲、陳復生和DJ夏妙然等亦有出席。據知Agnes的大仔安排於四地擺酒，之前已於台灣及日本設宴，香港是第三站，尾站將於7月在美國，屆時主要招待一對新人的同事和好友。
向94歲婆婆敬茶
穿上紫色晚裝的Agnes昨日帶一對新人、31歲大仔金子和平及新抱莊文若見傳媒，訪問安排在會所對開一條假日的行人專用街道，Agnes見到寬闊的馬路時開心地說：「好香港呀！」她透露親手布置會場的插花裝飾，但笑說：「啲仔有幫手，但就因為有幫手，搞到盆盆花都唔同，有啲好靚，有啲就……插出嚟怪怪哋，到時咪分到邊啲唔係我插。」她表示送了家傳之寶給新抱：「條頸鏈係我結婚時奶奶送畀我，依家佢係大新抱，就送畀佢。」問可會心急抱孫？她說：「聽阿仔口氣話新抱諗緊，最緊要個新抱肯諗，個仔諗係冇用。（幾多個？）梗係愈多愈好，又唔係我生。（幫手湊？）如果佢哋肯，我湊！」她又讚新抱：「好善良、好純品、好堅強，娶到咁好嘅新抱好感恩。」
儀式上致詞時，Agnes老公金子力說日語，再由她用英語翻譯，但疑因太緊張致甩碌，她亦忍不住笑。當聽到大仔表示有造人計劃時，她開心得連拍幾下手掌。一對新人在賓客見證下進行切餅儀式，再向94歲婆婆敬茶，Agnes喜極而泣對媽媽說：「今日係孫兒和平結婚！」並代母親派利是及餵母親飲孫新抱茶。
文：音樂組