袁偉豪索爆？？朋友（抓）做姊妹

袁偉豪、黃智雯、陳智燊（Jason）、郭子豪及林秀怡等，昨日到葵芳宣傳無綫劇集《三個女人一個「因」》，台上三位男主角分別演繹不同人格向Mandy求婚，Ben表現豪放，又呼喝又跪地，令全場爆笑！Mandy又與舞林高手陳俊堅表演現代舞，大晒舞功！

擬原班陣容演音樂劇

講到最近Ben在劇中扮女人「Dry Martini」引起回響，Mandy大讚他扮女人靚過自己，Ben笑說：「靚唔過Mandy，可能靚過一般男仔扮女仔啫！其實係模仿佢，受歡迎都係託佢鴻福。（你好媚態喎！）咁要多謝父母。」問到女友張寶兒有何評價？他說：「唔單止佢，仲有好多朋友睇過，難得有機會扮，就去盡佢！（有冇朋友叫你即場演繹幾種人格？）都有朋友開始混淆，又有人叫我婚禮做姊妹。（你OK？）唔化嗰啲妝都OK。」

Mandy在台上晒舞功，她透露只練了三小時：「之後會有個足本版放上網，有人提議我唱主題曲，我話不如跳一隻主題曲舞，遲啲仲可能以唔同嘅人格去演繹隻舞。」她又即場向Ben挑機，請他一同跳鋼管舞，但Ben說：「留番台慶先，唔係唔做，但要出師有名！」Mandy又表示考慮過跟其他藝員組跳舞組合宣傳，而Ben指監製提出或以原班陣容演出音樂劇，他亦躍躍欲試。

黃智雯與陳俊堅表現合拍，大騷舞技。	袁偉豪相當投入，即場跪地向黃智雯「求婚」！	郭子豪（左起）「艷福不淺」，在劇中咀勻袁偉豪和陳智燊。

郭子豪讚陳智燊好咀

此外，郭子豪在劇中瘋狂半裸騷肌，他透露之後會有親熱戲，但對手是Ben及Jason：「我個螢幕初吻係畀咗Ben，第二個係Jason。我開頭好開心，以為係我兒時偶像Mandy！點知係男仔，可能我得罪咗監製。（邊個好咀啲？）Jason個嘴軟綿綿啲，戥佢太太幸福。」身形暴脹的子豪透露正為八月的健身比賽落力準備，已增重40磅，現時220磅、手瓜17吋，但之後要節食收線條，過程非常辛苦！

文：影視組