自封瘋狂亞姐伍詠薇街喉洗頭
藝人伍詠薇、張文慈、江美儀、陳啟泰、尹天照及袁文傑等前晚出席「A記同學會」飯敍，前亞視台前幕後超過400人參加，場面盛大。
首次出席該活動的伍詠薇坦言：「我1994年離開亞視，今次嚟主要係同幕後班仔敍舊！」她回憶當年在亞視的開心歲月：「我係最瘋狂嘅亞姐，以前拍劇用背心膠袋入住對拖鞋周圍行，畀任達華話過唔顧形象。當年拍劇拍到天昏地暗，我就喺片場露天街喉洗頭，當年我套《還看今朝》有25點收視o架！」
張文慈則笑指參加聚餐似「返屋企」：「同啲老朋友敍舊咁。啱啱去完澳洲傳教，剛投入工作就接咗幾個廣告，所以我喺澳洲都有忍口。（有艷遇？）冇呀，雖然我試過同日本人拍拖，但未試過洋人，覺得即使異地戀，黃皮膚、黑頭髮嘅東南亞人易溝通啲。」
