諸葛為影靚相照踩7吋高踭

名媛諸葛紫岐近日因着錯鞋導致骨膜炎,但前晚活動上仍貪靚穿7吋高踭鞋!她又透露將與家人到日本旅行,繼續密密「造人」望生龍鳳胎,問到會否叫老公食虎鞭催谷?她笑說:「咁恐怖!順其自然!」

諸葛紫岐(Marie)與老公薛嘉麟、賭王何鴻燊四太梁安琪與兒子何猷亨、應屆港姐雷莊𠒇、何依婷、黃瑋琦與張寶欣等前晚到灣仔出席保良局周年慈善餐舞會。身穿7吋高踭鞋的Marie行路時有少許拐拐吓,右腳腳面更現紅腫,她解釋因日前穿上不合尺碼的波鞋,穿了一日後覺得腳痛,三日後睇骨醫證實患上骨膜炎,需物理治療及搽藥膏。問到為何仍穿高踭鞋?她笑說:「都諗咗好耐,因為要靚,影相啫!之後就會入去換鞋。」

造人唔使靠補品

Marie又透露稍後會跟家人到日本旅行約一星期,老公亦會同行,問到他是否負責「造人」?Marie笑說:「佢會照顧我哋,幫手拎嘢做咕喱。(造人?)希望快啲有好消息!(想BB係日本製造?)邊度製造都冇問題,最想係龍鳳胎!(接受人工受孕?)未使!遲啲先諗。(點催谷老公?畀虎鞭佢食?)唔使啦!咁恐怖!佢好忙,冇乜食補品,我相信順其自然,就算身體唔好,上天要畀你都會照有。」

張寶欣低胸險甩裙

至於張寶欣低胸露背晒性感,但晚裝不時下滑,睇見牙煙!她透露服裝是自己挑選:「着嗰陣冇嘢,但行先發現會跌落嚟。(瘦咗?)唔係,因為件衫太重!(怕走光?)唔怕嘅,但要一直拎住條裙,同埋用披肩。」雷莊𠒇則晒導彈身材,問到是否自覺身材好可撐起服裝?她自信地說:「可以咁講!件衫騷到我身材!」搞到張寶欣忍不住瞄了她一眼,稍露不屑神情。

此外,前日生日的四太表示已收到子女送的水晶醒酒器及杯,賭王何鴻燊照舊送「肉嘴」,但因太忙冇時間晒相放閃。她又讚猷亨落力為保良局服務,問到豈不是冇時間拍拖?四太笑說:「後生仔要拍拖實有時間!」

文:影視組