謝安琪嫌Juno留鬚太型去哈囉喂啱啲！
歌手謝安琪（Kay）前日一家大細到主題樂園為囡囡張靖舉行一歲生日P，她曾爆囡囡生日願望是見契爺麥浚龍（Juno），豈料當日Juno卻被拒諸門外，Kay解釋：「佢個樣唔搭調，除非係哈囉喂佢就啱嚟喇！」
謝安琪前晚與陳柏宇（Jason）出席地球熄燈一小時活動，連續第十年任大使的Kay，指腳上的鞋穿了至少五年，又自認是「斷捨離」的人，趁機鼓勵大家減少購買不必要的物品。而愛車之人Jason就指停車時一定會熄匙，並減少使用即棄物品。
老公麒麟臂惹細路追打
Kay大前日與老公張繼聰、囝囝張瞻及一班親友去主題樂園，為囡囡慶祝生日。問到有否邀請細女契爺兼老闆Juno出席，以滿足囡囡的生日願望？Kay笑言本想安排，但對方恰巧患上感冒，無奈願望落空。其後她又拿Juno的潮爆形象開玩笑：「契爺唔係咁適合去主題樂園，除非係哈囉喂佢就啱喇！佢通常留晒鬚又戴超又戴帽，裝扮同主題樂園有種唔搭調。所以我話唔緊要，等下次我哋約喺啲型嘅場合，我掉番轉將個女打扮得好有型先同佢見面。」
提到網民大讚老公身材好，尤其一雙麒麟臂撐爆衫，Kay笑言：「係呀，佢喺樂園度好似成為咗個景點，好多細路仔會走嚟打佢個手臂，啪啪聲咁！」
陳柏宇寸老婆乜都Keep
至於Jason則透露起初不明何謂「斷捨離」，知道後十分認同，更抵死地擺老婆上枱，笑言：「我唔贊成啲人咩都Keep，我鍾意將用唔着嘅嘢攞去捐，呢樣嘢希望可以感染到我老婆。佢成日話我掉嘢，我話唔係掉，係捐！嗱，我好明白我老婆比較重情，呢個係好事，如果佢可以將呢樣好事傳揚開去就好喇！」
文：音樂組