心穎被林盛斌反窒食鞭 馬國明尷尬爆「紅」
無綫綜藝節目《美女廚房》換上蕭正楠、林盛斌（Bob）主持，黃心穎台上寸阿Bob笑說：「你生咁多仔女，我整牛鞭畀你食啦！」阿Bob反擊心穎望向馬國明笑說：「牛鞭我就冇興趣喇！反而想試吓你成日食嗰啲鞭囉！」心穎被窒得無力反擊，變成「Mr.鞭」的馬國明亦「鞭長莫及」無力支援女友。
馬國明與心穎被問到是否很尷尬？她說：「唔係好尷尬，只係唔知點接啫！」被弄得面紅耳熱的馬國明笑說：「唔係，熱啫，阿Bob不嬲都鍾意講笑，我都玩得嘅，驚條片出唔到街啫。」黃心穎讚馬國明愈來愈風趣搞笑，認為不是受她感染，心穎甜笑對馬國明說：「你睇你個樣幾尷尬。」
心穎自言不懂烹飪，只會煎蛋、炒菜、煮公仔麵，希望上《美女廚房》發揮小宇宙。問馬國明可願意食一世心穎煮的公仔麵？他笑說：「接受到，我食嘢唔揀擇。」講到將開合拍劇《衝上雲霄2020》，心穎希望自薦演一角，因為以前很喜歡該劇，但並非為看馬國明，而是覺得吳鎮宇十分有型。