陳凱彤球場打躉又要威又要戴頭盔

身水身汗 暴曬中暑

歌手陳凱彤（Lillian）中學期間在石硤尾讀書，此區可謂滿載她的少女心事及回憶，講到學校附近的球場，Lillian坦言曾流下不少心機和汗水，皆因無論是參加課外活動或上體育堂，也在球場度過，她說：「呢個球場我哋俗稱叫黑地，點解咁叫呢？其實我都唔知，總之係傳統傳落嚟咁叫。最記得上體育堂，都係喺呢個球場，我覺得好辛苦，因為好曬。」

再加上Lillian的課外活動是參加步操銀樂隊，平時練習同樣在此球場：「每次去練嘅時候，附近都好多人圍觀，因為我哋一練習就好多人都會聽到。步操嘅時候要着制服，又要戴頭盔，真係好熱，我記得有個女仔真係中暑，之後要送返去學校。（咁嗰陣你咪好瘦？）嗰陣我食好多嘢，太多好嘢食！」

陳凱彤難忘當年在球場暴曬，搞到成身濕晒！	陳凱彤指石硤尾去深水埗，行路同搭港鐵時間差唔多。	陳凱彤

專治失戀 吹水療傷

球場旁邊的藝術中心，是Lillian留下不少腳印及充滿少女回憶的地方，皆因當年放學沒有好去處，故愛在藝術中心流連，她說：「呢個地方係公眾場地，又唔使用錢，我哋會嚟呢度傾吓偈、溫吓書。」

談到當年的話題，Lillian說：「我哋乜都傾，但我有嘅經歷都係我啲朋友嘅，多數係佢哋失戀，我陪佢哋傾偈。（有冇約同學返嚟懷念？）我大部分同學都係住附近，因為呢度係中學區，所以唔止呢個地方，其實係成個石硤尾都係我嘅回憶。中學畢業嗰日，我哋成班同學簽名落校服度留念，我哋都專登嚟呢度影相。」

陳凱彤當年放學後最愛在藝術中心溫書。

陳凱彤夠細心有耐性，常會聽同學傾訴。

港鐵快？行路快？

Lillian當年讀書曾與成班同學一齊做「實驗」，測試由學校搭車還是行路去深水埗較快，她說：「其實由學校搭港鐵去深水埗，同行去深水埗時間係差唔多。我哋食飯多數唔喺呢一頭，我哋係會專登行去深水埗，我哋以為搭港鐵會快好多，但其實唔係囉！」