唐文龍劏房肉搏抗通脹

個個話大佬似羅莽或Hugh Jackman嘅狼人，由香港數到去荷里活，唔係荷李活道，係Hollywood呀！你話我係咪威先？今次我要出場，因為同大佬做咗兄弟48年，有乜我唔知？真係睇住佢大，我講嘅大，係「大鑊」呀！喺紐約讀完個時裝博士返嚟，個個月Un Un腳(逗)三萬幾，爭啲做埋理工大學教授，但為咗做明星乜都放棄。出碟出到間唱片公司都執埋，轉去拍戲撈唔起，人工得番四千幾，千八蚊劏房呎數得七十幾，碟頭飯食唔起，長期快餐乾啃，唔敢叫餐飲，只為慳番三個幾，大佬唔頭痕就奇！

偷嗒咪神唔認數

奇就奇在，可能佢睇得史泰龍套《Rocky》多，嗰份正能量去到汕尾以南！人哋去「做尖」，大佬當劏房同公園係「尖窿」自學打拳操肌，依家震幾吓波已經搞到港女嘩嘩聲，十幾廿年前就個個媽媽聲，話係頭腦簡單，四肢發達嘅大舊衰！大隻佬都有叻仔，史泰龍IQ都拍得住霍金有160啦，可惜我大佬EQ仲高過IQ，以前為兩餐焗騷肌，被踩波大冇腦玩HeHe，連老竇都問佢係咪唔吼女人除！冇錢冇女，唔通Share碟頭飯、捽手仔行公園吸靈氣又一Day咩？

講開女，我大佬一直人性克服獸性！同陳少霞拍拖六年，師傅話八字唔夾而分手！如果係真愛，梗係不愛江山愛美人，但五窮六絕時，唔到你唔信，我大佬都認迷信，唔想累人累物，好似之後同個空姐女友七年都係得個「拮」，即係周身冇蚊日日拮大髀呀！最後狠心一刀切，情願唔要美人，獨自落鑊打江山！早排話佢同億萬千金、咪神黃文意拍拖搞父女戀，佢唔認都係怕畀人話食軟飯！

奶粉罐塞錢救兄弟

與其話我大佬似羅莽，倒不如話佢似王小虎，一身好武功都係長期街頭訓練，同樣超有義氣！佢一好景，就打個金牌畀「沙煲兄弟」曹永廉報恩，見同自己傳過HeHe嘅劉永健唔掂，就將堆錢塞落奶粉罐話請飲奶喎！

雖然我大佬好景唔使再住劏房，但好睇唔好食呀！佢同全港市民一樣，都要諗計抗通脹，早排統計處話有接近21萬人住劏房，就知個市有幾好啦！唔好話月入過萬，好多月入四萬都係咁住，人工加劏房租金一樣加，求過於供，劏房閒閒哋至少八千，想平啲？廁所煮公仔麵囉，廚廁客睡四合一添！我大佬呢個都市悲歌系列，係唔少港人寫照，尤其喺呢個胡亂派糖、有錢都唔識使嘅香港地生活，有得住都好過瞓街，住劏房唔係醜事，「斗室有限，我願無窮」，有呼吸就有希望，劏房都會出英雄呀！

Nuts哥