生夠兩個！高海寧取經學做媽咪
藝人高海寧與丁子朗昨午出席商場新春活動，高海寧早前驚現「鬼剃頭」，她表示康復中：「依家冇特別去照鏡（睇鬼剃頭），但髮量係OK嘅，深信會生番出嚟。可能因為已經唔係第一次，冇咁驚，但喺馬來西亞拍戲發現時，都有睇醫生同打針，盡量放鬆自己。（男友擔心？）冇，不過媽媽同爸爸即刻停工，飛嚟陪我、煮飯畀我食，仲話只可以為我做呢啲，令我好感動。」
談到稍後開新劇扮演8歲男孩的母親，高海寧笑言要向媽媽取經：「我未做過人母，不過細個成日幻想22歲結婚、25歲生小朋友，依家只可以隨緣，我點都會生嘅，最好生兩個。」
而擔任活動司儀的區永權今年「過肥年」：「初一同初四都有騷要做，初四幫古天樂影迷會團拜做司儀，我帶埋兩個仔去，佢哋𢭃咗古仔封大利是，我見到都嘩一聲，個仔見到古仔勁興奮。」