洪永城期待一拖二見人
藝人湯洛雯、洪永城（Tony）、劉思希與謝東閔等，昨日在電視城出席新劇《丫鬟大聯盟》拜神儀式。Tony透露今年準備了五位數利是，但極速「清倉」，要急急向助手求救！單身的他透露到親戚家中拜年時要應付「問答大賽」，笑說：「有問我點解唔係兩個人嚟，希望下年可以兩個、甚至三個！（有冇同唐詩詠拜年？）冇喎，或者之後有共同朋友嘅活動可以見到面。」
湯洛雯透露農曆新年與家人去了泰國旅行，提到妹妹湯樂瑤經常晒性感靚相，她笑說：「佢鬼妹仔性格係鍾意Sexy啲，當年我都係咁，依家要有番啲家姐風範。（着泳裝晒性感？）我一件頭o架！（媽咪都搶鏡？）佢潛水衣添啦！」至於劉思希劇中飾演鹹濕大小姐，對謝東閔相當「猴擒」：「做咗好多平時想做、但又唔做得嘅事，仲會餵東閔食春藥、長期着肚兜四圍走！」
