江嘉敏拍拖講Feel：話之你係彭于晏！
「文青女神」江嘉敏（Kaman）在剛過去的雞年可算是事業大躍進，在無綫劇《親親我好媽》、《不懂撒嬌的女人》和《誇世代》的演出均大獲好評，相信狗年會繼續人氣急升。問到1994年出世、肖狗的她會否多「狗公」埋身？她即扮傻笑說：「即係屬狗嘅男仔？梗係多啦，一齊讀書嘛！（圍住你團團轉？）冇喎，唔知係咪忙於工作冇留意到，依家想工作上畀多啲心機，同埋都唔急，我好後生！」又指自己不會被誠意打動：「好睇感覺o架，唔理你係彭于晏咁靚仔定孔劉咁Charm，我唔鍾意你，你圍住我轉都冇用！（謝絕狗公？）咦，唔睬你！」
曾介意外界談論緋聞
談到今年「犯太歲」，Kaman笑說：「唔驚！（知自己鴻運當頭所以唔怕？）其實我好少留意，通常係媽媽留意，佢有同我講今年要特別注意腸胃。」問會否覺得去年好運？她直言沒預料過可以行得咁快：「好滿意成績，好開心可以劇接劇。（太快難適應？）還好，好多謝一直以來遇到嘅人，佢哋令我學到唔同嘅嘢。（有冇因上位快而聽到閒言閒語？）身邊嘅都係好人，冇聽過呢啲！」談到她最近拍攝新劇《兄弟》而與人夫王浩信傳緋聞，她坦言一度介意外界評論：「我知自己每次好努力就得。（浩信特別對你好？）其實個個都對我好好，好似江美儀、黃智賢同張繼聰等，會話畀我知我嘅缺點，令我可以改善。」
場地：香港九龍東皇冠假日酒店