張智霖對老婆大細超：平淡是福！

回顧剛過去的雞年，張智霖（Chilam）的工作比預期還要忙碌，兼且風塵僕僕，尤其近年尾的四個月因投入拍網劇，更見心力交瘁：「同好多拍檔都有對手戲，差唔多日日都要趕工！臨尾我仲要飛布達佩斯及馬來西亞拍外景，可能離開香港太耐，好掛住屋企人、屋企嘅狗狗，甚至香港嘅美食，好想快啲飛返嚟！」

問幾時先返 好有壓力

Chilam父子感情一向深厚，如今張家有兒初長成，11歲囝囝魔童正值由男孩變青少年的敏感期，但今次離港搞到雙方整個月沒有機會見面，每日只靠Facetime互通消息！他坦言聽得兒子問得最多的，便是「究竟你幾時先返嚟？」令他心有戚戚然：「聽到真係好有壓力！佢需要一個Role Model，而我亦唔想錯過佢成長嘅點滴，不過今次真係冇辦法！依家返到屋企，我打算呢個農曆新年都用嚟陪佢，食、玩、做乜都冇所謂，最緊要一齊！」他直言已計劃向公司請假，直到3月也不接工作，好好休息及享受家庭樂。

張智霖新一年望有好劇本發揮，話明「重質不重量」。	張智霖笑言與老婆袁詠儀細水長流，平淡便是福。	張智霖為開工而冷落袁詠儀及魔童，令他心有戚戚然。

同樣因工作在身，Chilam未能與太太袁詠儀（靚靚）好好慶祝結婚17周年，他卻笑說：「有時平淡是福，唔需要刻意去搞啲乜嘅！嗰日佢嚟咗馬來西亞陪我拍戲，仲要齊齊坐長途車來回拍攝場地，但我哋又覺得OK喎！（送禮物？）唔喇！」話雖如此，Chilam輯錄了一系列家庭照，並以冧爆英文歌作配樂，製成小短片送給太太，靚靚怎不冧爆？

狗年減產 貴精不貴多

談到狗年的新年願望，Chilam希望遇到好劇本、好導演同有得發揮的角色：「未必話係減產，但會揀精嘅嘢嚟做，阿一（經理人公司老闆蕭定一）幫我篩選咗三、四個劇本喇。我一路都想話做導演，但呢啲嘢唔可以操之過急，嚟緊一年相信都會穩守演員崗位。」肖豬的他未有擔心狗年運程：「應該咁講，我覺得『人就係風水』，即係話只要唔好心存歪念，就唔會有唔好嘅事發生。」

文：影視組

攝：吳文聰