陳瀅何雁詩地獄廚神赤口「炒」大鑊！
閨蜜劉佩玥、陳瀅及何雁詩並非煮得之人，三人齊齊炒蝦拆蟹學做女廚神，為未來做賢妻鋪路！適逢年初三「赤口」，三人就互爆黑歷史，陳瀅試過煎燶餃子、何雁詩將老火湯擺到發霉，劉佩玥更誇張，陳瀅與何雁詩根本未見過她入廚房！
藝人陳瀅（Jeannie）、劉佩玥（Moon）與何雁詩（Stephanie）是娛圈好姊妹，Jeannie與Stephanie更曾是同居密友，三人決定趁農曆新年學好廚藝，為未來學做賢妻！一向喜歡吃海鮮的Jeannie，率先入廚房跟師傅學做「黃金蝦」，見她有板有眼，面對大火爐頭都絕不怯場，而Stephanie則學整「避風塘炒蟹」，細細粒的她炒蟹時似模似樣，而Moon則挑戰難度最高的「發財好市」。
發霉湯煎燶餃
三人互相試食對方的成品，亦趁年初三「赤口」互爆彼此入廚黑材料，Moon爆料指Jeannie試過煎餃子給她吃，在客廳等食時聞到一陣燶味，走入廚房見到餃子已被煎燶：「佢仲好自得其樂咁同我講，『就有得食啦』！」Stephanie亦踩多腳爆Jeannie連麵包都會焗燶：「試過佢焗完麵包第二日，我打開個焗爐，見到有舊黑色嘢喺入面，原來係佢見個麵包焗燶咗，冇食到，就咁擺喺入面冇執。」Jeannie則反擊指Stephanie同樣冇手尾，會擺到食物變壞發霉，Moon補充說：「佢飲唔晒啲湯就會擺喺度，擺到發霉佢都唔拎去洗。」問到Moon的廚藝如何？Jeannie與Stephaine表示不知道，皆因從來未見過她行入廚房。
享受單身唔急求偶
過去一年三人都有得失，Stephanie直言去年是非纏身，負面新聞不斷令她情緒爆發，她坦言事過境遷，情緒病亦已康復，目前與男友鄭俊弘感情穩定。單身一年的Jeannie直言享受，目前未遇到好對象，覺得感情事要隨緣。Moon則緋聞不斷，與周志文頻被影到去街，她卻說全是冇米粥，她亦直言不恨拍拖，指身邊已有很多人錫她。
文：影視組
劉佩玥服飾、化妝及髮型：Sinequone、Angela Shum@Anjo Makeup
場地：辣蟹舫