羅力威：雨僑做咩我都好冧！
雨僑與未婚夫羅力威昨日食情人節大餐，共度婚前最後一個情人節。期間兩人不停放閃，雖然阿威踢爆雨僑為人「呢啡」，但大讚雨僑做任何事都冧到他，而雨僑亦甜爆表示婚後會較輕鬆，因為萬大事都有老公！
即將拉埋天窗的歌手雨僑與羅力威昨日到紅磡慶祝情人節，並率先試食白色情人節（3月14日）套餐，共度浪漫時光，但雨僑表示原來兩人甚少慶祝節日：「因為日日都係情人節，結婚之後都係情人節。」講到為對方做過最冧的事，阿威即大放閃光彈：「其實佢做咩我都好冧，有時煮嘢畀我食已經好冧。」又坦言兩人有心靈感應：「我哋好清楚對方會做啲咩、鍾意同唔鍾意做啲咩，互相了解到佢一趷起條尾就知佢想做咩。」
升呢人夫感緊張
講到如此了解對方，叫他們即場數對方的優點缺點，雨僑先讚阿威細心，缺點就是經常改變主意：「例如佢揸緊車話睇完戲先食嘢，下一秒毫不解釋就急轉彎，一落車就去買嘢食。」而阿威就讚雨僑成熟、聰明及為人正常：「我哋嘅正常係諗嘢同價值觀方面，佢有晒所有優點，好識喺人哋立場諗。」但同時亦大爆雨僑為人「呢啡」：「佢啲手袋好亂！同埋除隻襪出嚟係反嘅，除件衫出嚟隻袖喺件衫入面。」
提到將於3月31日結婚，阿威坦言對升呢人夫感到少少緊張：「我一路都似細路仔，有時講嘢冇顧好多嘢，但結咗婚就好多嘢要顧，包括言行舉止同心態，都要提醒自己成熟啲。」雨僑就覺得結婚後會較從容，因萬大事都有老公。講到婚禮安排，阿威表示簡單開心就可以：「最重要唔係儀式，而係儀式後兩個人行嗰段路。」
生仔買樓隨時負擔到
至於可有置業計劃？雨僑說：「呢方面唔太擔心，我哋一直都唔覺得物質係好重要，覺得依家住嘅地方都幾舒服，直至生小朋友先考慮買樓，到時要諗住邊同校網，唔再好似依家咁瀟灑，鍾意租邊度就租邊度。」問到預計何時會儲夠錢生仔買樓？雨僑指隨時都可以負擔得到，但心智就未準備好。講到農曆新年，兩人明言不會搶閘派利是，因為未結婚，但會派開工利是。
文：音樂組
髮型：Adam Hui @ W SALON BY IL Colpo
雨僑服裝：DorisKath
羅力威化妝：Lily Lam @ndnco
場地及套餐：都會海逸酒店千鶴日本料理