傅穎遊日冇停口：還我馬甲線！
傅穎早前到日本關西旅行，今次亦是她第一次踏足大阪、京都及奈良，全程以食及觀光為主，罕有地沒有Shopping。她笑言做足遊客常做的事，例如着和服穿梭京都大街小巷，在奈良隨處見到可愛鹿仔，饞嘴的她狂掃街邊小食，一日食足幾餐，結果一發不可收拾，之前艱苦練成的馬甲線無影無蹤。
入廟唔拜神
傅穎與很多遊客一樣，穿起和服在京都清水寺四處影相，由於當時染了粉紅髮色，故她特別揀了一套粉色和服配襯：「其實我着嗰套唔係正式和服，係浴衣，冇咁多層冇咁複雜。最初我個朋友唔願意着和服，但我覺得難得嚟到咪着，算係京都一個美好回憶。我記得係幾百蚊租一日，連埋個小手袋。」但由於清水寺人頭湧湧，她沒有拜神許願：「近年我唔敢去寺廟求神許願，因為許得願就要還，唔想麻煩。」
立食拉麵
傅穎捧住大大碗拉麵食得津津有味，由於該拉麵店在大阪非常出名，經常排晒長龍。她說：「嗰日我同朋友都排咗半個鐘有多，因為間麵店好細，入面啲位唔多，所以好多人都係好似我咁捧住碗麵企喺街度食，碗麵真係幾好味。」
風景如畫
傅穎在奈良入住藥草山的一間酒店，山上面有出名景點，日與夜的對比有着不同景色：「朝早上去藍天白雲，就好似置身漫畫裏面嘅風景，夜晚一大片星海，真係靚到不得了，感覺好Relax。」
(目及)嘢貓咪
街頭掠影！兩隻企高的貓貓公仔，豎起條尾「裝」乜呢？傅穎見兩隻公仔咁搞笑，當然要影相啦！
榮升母親
傅穎在大阪品嘗河豚刺身，覺得味道與一般魚生差不多，冇乜特別味。不過最搞笑店內有一個中國籍侍應負責招呼她們，由於傅穎比她的朋友年長幾歲，朋友就開玩笑對侍應說：「我同我媽咪嚟！」估不到對方信以為真，並說：「你媽咪好後生。」朋友笑說：「係呀，佢化咗妝嘛！」結果傅穎做了一餐飯的「媽媽」。
Big得太緊
穿上和服的傅穎在京都街頭漫遊：「我要Keep住小碎步咁行，平時我已經行得慢，着咗和服仲要再慢啲。」她更自爆因為不停吃，愈食愈肥，結果穿和服時，她笑言紮到個肚好緊：「我已經決定要減肥，還我馬甲線。」
識飲識食
這餐豐富的料理是在奈良入住的酒店用膳，感覺到日本人對食的講究。
指定動作
第一次踏足大阪的傅穎，在著名的心齋橋留倩影。
影相達人
每次旅行，傅穎除了愛吃，最鍾意就是影相，反而不愛自拍。她說：「我好多相都係影食物、街頭，景物。」圖中的大南瓜是在京都拍攝。