林志玲倒模8小時苦不堪言
台灣藝人林志玲放下女神包袱，接演星皓賀歲片。戲內扮演中性河神的志玲甘棄亮麗外表，接拍前花上8小時，接受來自荷里活特技化妝團隊的面部及身體倒模造型，飽受皮膚敏感之痛。導演鄭保瑞大讚志玲演出給人脫胎換骨之感，可算辛苦有價。
今次《西遊記女兒國》一眾主要演員如郭富城及羅仲謙等，造型全部都「攞苦嚟辛」，就連城城也提到拍攝時敏感藥膏是他們的「最佳良伴」。導演鄭保瑞雖對演員的遭遇感同身受，卻愛莫能助，連女神志玲亦「難逃厄運」，一向易皮膚敏感的她，由倒模造型至煞科，一直受嚴重皮膚敏感困擾，苦不堪言。
狂吊威吔
近日一條有關她接受倒模過程的片段曝光，只見束起辮子的志玲不停被倒上白、綠及紫色等化妝顏料於粉臉及頸上，遠看工作人員似在打造蠟像，完全看不出志玲「真身」，加上髮線及面上皮膚遭大力掹緊，志玲痛苦可想而知。影片末段工作人員幫她打開倒模，女神即鬆一口氣。據悉，拍攝過程中志玲每天都要花上5小時化妝，開工有超過一半時間被吊在威吔上，可見今次她為演好角色，完全豁出去。
獨腳演感情戲
鄭保瑞受訪時，對志玲的表現讚不絕口：「對佢嚟講係好大嘅挑戰，相信佢都掙扎過，亦都要做好多心理上嘅建設。佢孭住個化妝仲要演戲，而每日望住塊鏡都認唔出自己，相信大家未見過林志玲呢一面。（佢有冇喊過？）我未見過，但辛苦係必然同想像得到嘅，尤其佢同蘇麗珊嗰段感情，兩個都獨自演，完全靠佢哋嘅想像力。」
文：影視組