陳爽食腦人妻 老公乜都啱
藝人陳爽與金融才俊梁梓軒婚後育有一對子女，她直言不愛用腦，樂做小女人，崇拜老公到極點：「每一次老公都係啱！」
「幸福人妻」陳爽婚後誕下一子一女，其夫家三代經營參茸海味生意，自然日日進補。她說：「每日食少少燕窩，每個禮拜食吓冬蟲草、花膠、阿 膠，有時加海參，有時鮑魚，通常老公煮，佢煮海味好叻，由細到大學咗好多知識，嗲吓佢就會整畀我食，哈哈。」
做「女工」似模似樣
每逢過農曆新年，由於親戚眾多，拜年時送海味籃送到手軟。幾年前創立骨膠原專門店的她，今年忽發奇想，與時裝設計師何國鉦合作推出富藝術風格的海味籃，早前她更做「女工」，在放置海味的雀籠加上蝴蝶裝飾，似模似樣。
兩人首次合作，何國鉦取笑陳爽唔醒目：「識親嘅靚女都幾醒，但同佢識耐咗，發覺原來佢係傻傻哋嘅小女人。」陳爽即解釋：「我唔太鍾意用腦，太辛苦。（老公今次有冇讚你醒目？﹚老公好有腦，因為每一次佢都係啱嘅，無論大事小事，每次佢話咁做，就算我唔同意，但最後我都會後悔。不過今次佢讚我，做後台支持我。」
帶仔女旅行勁辛苦
去年聖誕，陳爽與老公首次在沒有傭人陪同下，帶子女去澳門旅行，她笑言旅程儼如做苦工，極為痛苦，不過農曆新年決定再度挑戰，「遠征」新西蘭，難度升級。她說：「經過上次教訓，兩個小朋友瞓覺時間要控制好啲。原本諗過只帶大仔去，但老公唔捨得細女。不過今次喺當地請咗個兼職保母，佢係一個好可愛嘅女大學生，最開心係佢識影相，可以幫忙吓。」
文：Tracy Leung
攝：秦健輝