盧慶輝冰冷浸污水做冇打演員

藝人盧慶輝當年憑出演無綫處境劇《真情》「立生」一角而打響知名度，更與劇中拍檔張慧儀日久生情，惜戀情未能開花結果，十多年前他忽然「息影」，搬往內地從事房地產生意，且於北京「扎根」成家立室。最近他決定捲土重來「復出」拍戲，早前演出《賭城群英會》後，最近又特意返港客串演出英皇網劇《PTU機動部隊》，49歲的他尚算保養得宜。

赴橫店「坐監」

談到今次返港拍戲，他笑言最不習慣是背誦廣東話對白，容易食螺絲，又指自己充當「冇打演員」﹕「其實係演警司，所以冇乜動作場面。本來戲份重啲，但因為嚟緊我要去橫店拍攝馮小剛首部網劇《劍王朝》撞咗期。戲裏面我做男主角嘅軍師，一睇分場同劇本就知好甘，事關當地天氣零下，但重頭戲講我被困在監獄，仲要浸喺墨汁色嘅污水入面。」

離京難捨囝囝

已離港一段頗長時間，問盧慶輝有否與昔日同事及朋友聯絡？他說：「我次次都來去匆匆，敍舊嘅機會比較少。（有興趣再返無綫拍劇？）佢哋都冇搵我。（復出搬返香港住？）我諗唔會嘞，屋企同公司都喺北京嘛！」談到北京生活，他似乎頗為適應，提起四歲囝囝，盧慶輝更笑逐顏開：「我喺屋企做掌上壓，佢就會騎上嚟，佢真係好活潑，好多時捉都捉唔住。（離家開工最唔捨得佢？）都係，佢亦好黐我，試過我唔喺屋企，佢睇電視就指住電視機問媽媽：『爸爸喺度？』（追多個？）應該唔會嘞！」

盧慶輝於英皇網劇飾警司，與張繼聰及譚耀文合作。	盧慶輝當年演《真情》與拍檔張慧儀日久生情，惜未能開花結果。	盧慶輝與妻兒在北京定居，暫不考慮搬返香港。

文：影視組　

攝：鄭家俊