關寶慧慘遭縫嘴斷食當減肥
關寶慧為新片創新難度，挑戰驚嚇妝容，慘被針線縫實雙唇，搞到斷水斷糧，但她笑指可以變相減肥，還透露雙手都有特技化妝，搞到去廁所都困難重重，認真大犧牲！
藝人關寶慧、衛詩雅、林德信與吳耀漢等日前到馬來西亞拍攝新片，其中戲路多變的關寶慧以破格造型亮相，慘被針線縫實雙唇！雖然看起來非常驚嚇，但她卻笑說：「其實咁樣都有好處，因為嗰邊實在太多嘢食！唔單止好食，仲要好平！畀人縫住個口就有晒理由抵抗呢啲誘惑，因為我每次開工都係堅持邊拍邊Keep弗。」
雙手化特技妝 呻如廁難
除了慘被「縫嘴」，關寶慧又透露連雙手都有特技化妝，所以連如廁都非常不便，索性唔飲水！問到有否頂唔順？她即稱自己意志堅定：「開工唔肥得！就算拍完通宵戲，我都一定會着晒『全副武裝』先至瞓。（煞科即破戒？）梗係啦！又食榴槤又食麵，一日食幾餐！」
不過，關寶慧坦言只能放縱一會，因為除了為ViuTV主持節目，稍後又要與劉玉翠及莫家堯等演藝學院校友排練舞台劇，準備在年末公演：「劇本仲翻譯緊，完成後就會圍讀。（好高難度？）都係！因為我個角色喺外國多數會搵大牌演員做，我唔敢講自己有呢個Level之餘仲要做十幾場。」她又指今次是畢業後首次與劉玉翠合作，非常期待：「我深信大家一排戲就會上晒手，效果應該會好好，但真係估唔到一眨眼就畢咗業成30年！」
文：影視組