梁朝偉同空氣過招要求加人工
影帝梁朝偉將於賀歲電影放笑彈，惟經常要與空氣做對手戲，令準備工夫做多倍，笑指下次要加人工。對於與太太劉嘉玲不約而同演喜劇，偉仔自言搞笑天分比太太優勝，更指隨住年齡增長，很多事也毋須過分認真，務求做到嚴肅之餘帶點幽默。
已有一段時間沒接拍賀歲電影的梁朝偉，今次拍電影《捉妖記2》陪大家過年。留港度歲的他日前抽空接受訪問，大談拍攝過程的喜與樂。他透露於上海觀賞該片的第一集時，勾起他童年睇卡通片的感覺，再加上一直欣賞有份演出的內地女星白百何，故最終答應演出。
做自己自言自語
拍攝初期，北京氣溫低至零下10多度，偉仔要應付兩星期的外景通宵戲份，苦不堪言。他坦言：「嗰時仲係聖誕節，幾難頂，不過除咗天氣，其他都好開心，冇諗過35年前做兒童節目，35年後可以拍畀細路仔睇嘅戲，都幾得意。（之後拍多啲喜劇？）唔知呀，都鍾意喜劇，但係最近連續拍咗三部，係時候要休息吓，同埋都想多啲時間陪屋企人，陪媽媽四圍去玩同食嘢，但都冇得休息太耐，因為老闆想拍一個外傳，期都度埋。」
偉仔於片中與精靈老友鬼鬼，但拍攝時卻要對住空氣演出，問到會否感困難？他坦言埋位前要多加想像力：「要諗埋精靈嘅表情係點，平時做戲睇對手表情做反應，但今次望住空氣點反應呢？所以下次要老闆加人工，做多啲功課喎！戲入面同『笨笨』係好兄弟，有同導演講可唔可以攬佢，佢話好難畫，我就想有身體接觸囉。（拍完套戲會自言自語？）我平時都係咁，做番自己。」
年紀愈大愈幽默
對於太太劉嘉玲曾表示喜劇會令人變得開心，更指演技比老公更好，偉仔對此笑稱：「佢批評我多啲，其實都係畀意見指教吓，不過其實每個演員都有自己Style，好難去比較。（邊個搞笑啲？）我囉！唔知係咪年齡關係，覺得好多嘢唔使太認真，可以幽默吓，好似返去小朋友咁傻氣啲。以前我嚴肅啲，慢慢去到某階段就會改變。（嘉玲鍾意你邊方面？）兩樣都鍾意，當然要喺嚴肅中帶少少幽默。」
文：影視組