昆西鍾斯爺孫戀差啲做特朗普女婿

米高積遜（Michael Jackson,MJ）恩師、於樂壇舉足輕重的昆西鍾斯（Quincy Jones），入行至今不時自爆驚人往事及風流史。早前他接受雜誌《Vulture》訪問宣傳新紀錄片時，談到年屆71歲的現任美國總統特朗普（Donald Trump）施政時突然「跳線」，風騷自爆12年前曾與當時只有24歲的特朗普女兒伊萬卡（Ivanka）拍拖。訪問他的記者難以置信下再三追問，昆西更爆出是伊萬卡採取主動，是她找來設計師Tommy Hilfiger牽紅線，昆西說：「同我個女Kidada工作嘅Tommy Hilfiger同我講『伊萬卡想同你食晚餐』。我就答『冇問題，佢好X索。』佢有一對我從未見過最靚嘅腿。可惜，揀錯老竇。」

22名女友遍全球

雖然昆西未有多講戀情最後如何發展，不過就狂爆粗批評險些有機會做其「外父」的特朗普：「我曾經同佢（特朗普）一齊出去，佢係個瘋狂嘅X街，一個自大及自戀狂。我唔能夠頂得順佢，佢乜X嘢都唔識，一個真正識得領導嘅人，就唔會好似佢咁，有咁多人反佢，佢係白X癡。」對於昆西言論，伊萬卡和特朗普以及白宮方面暫時未有回應。伊萬卡於90年代中、約14歲時曾為Tommy擔任模特兒，2006年即昆西表示與女方撻着的時期，伊萬卡曾與美國男星Topher Grace拍拖，翌年被爆與現任老公庫斯納（Jared Kushner）結識，兩年後拉埋天窗，現育有三名子女。

其實昆西於行內出名風流，先後結過三次婚，前妻包括Jeri Caldwell、影星Ulla Andersson及Peggy Lipton，雖然三段婚姻失敗，但仍相信激情，撻着Carol Reynolds及女星娜塔莎金絲姬（Nastassja Kinski）等，加上與前妻所出，共有7個仔女，早年更曾傳搭上超模娜奧美金寶（Naomi Campbell），近年雖未有固定女友，但不受世俗觀念束縛的他月前就自爆現時「一腳踏22船」﹐於世界各地包括上海、開普敦與斯德哥爾摩都有女友，年齡由28歲至42歲不等，大家都知彼此存在但不介意。

批評夢露胸似啤梨

而他不單「大食」，更好「挑食」，曾於訪問中明言嫌棄已故荷里活女神瑪麗蓮夢露（Marilyn Monroe），指歌王法蘭仙納杜拉（Frank Sinatra）在生時曾想撮合他與夢露，不過他自言嫌棄女方胸形似啤梨，毫無美感！昆西除自爆亦「引爆」另一「重磅淫史」，爆出已故男星馬龍白蘭度（Marlon Brando）曾與兩名已故男星騷靈天王Marvin Gaye及李察派亞（Richard Pryor）性交。

另外，昆西於訪問中對MJ都「有話兒」，爆他生前好貪心，偷了不少歌手的歌又不付版權費，更舉例指MJ曾抄襲女歌手Donna Summer的歌《State of Independence》改編成名曲《Billie Jean》，提及MJ整容傳聞時，昆西大爆：「佢成日辯稱因患病（才變樣）。廢話！佢因佢老竇曾話佢醜樣並虐待佢，搞到佢對個樣冇信心。」

文：外娛組